बागलुङ, ३ चैत । काठेखोला गाउँपालिका–२ भीमापोखरामा शनिबार सहकारी शिक्षा कार्यक्रम सम्पन्न भएको छ ।
गुहेंली सञ्चार सहकारी संस्था लिमिटेडले आयोजना र गण्डकी प्रदेश सहकारी रजिस्ट्रार कार्यालय पोखराको प्राविधिक सहयोगमा सहकारीका शेयर सदस्यहरुलाई सहकारी शिक्षा दिइएको हो ।
कार्यक्रमको उद्घाटन सत्रमा बोल्दै गण्डकी प्रदेश सकारी रजिस्ट्रार कार्यालय पोखराका रजिस्ट्रार भेषराज रिजालले सहकारीमा सञ्चालकले आफुखुसी ऋण दिन नमिल्ने बताउनुभयो । उहाँले संचालकहरुले आफुखुसी ऋण दिँदा सहकारीको अवस्था विग्रिदै गएको बताउँदै ऋण लगेका शेयर सदस्यहरुले पनि समयमै ऋण तिर्नुपर्नेमा जोड दिनुभएको थियो ।
उहाँले सहकारीहरुले सामाजिक उत्तरदायित्व वहन गरी सदस्यहरुको आर्थिक, सामाजिकि समस्या र समाधानका लागि काम गर्नुपर्नेमा जोड दिनुभएको थियो ।
कार्यक्रममा जिल्ला दुग्ध सहकारी संस्थाका अध्यक्ष दिपक गौतमले पछिल्लो समय सहकारीको भ्रम रहेको भन्दै शेयर सदस्यले सहकारी के कस्ता अवस्था छन् बुझ्न जरुरी रहेको बताउनुभयो । उहाले ऋणीहरुले समयमा नै ऋण तिर्नुपर्ने बताउँदै नतिरेमा कानुनको भागिदार हुनुपर्नेमा जोड दिनुभएको थियो ।
सहकारीबारे आधारभूत ज्ञान, सहकारीले प्रदान गर्ने सेवासँगै सहकारी नीति, नियमबारे सदस्यहरूलाई जानकारी दिन सो कार्यक्रम गरिएको संस्थाका अध्यक्ष खिम बहादुर कार्कीले बताउनुभयो ।
कार्यक्रममा सहकारी रजिस्ट्रार कार्यालयका पोखराका रजिस्ट्रार भेषराज रिजालले सहकारी कानुन सम्बन्धी कार्यपत्र प्रस्तुतीकरण गर्नुभएको थियोभने शाखा अधिकृत चोलाकान्त वाग्लेले सहकारीता सम्बन्धी कार्यपत्र प्रस्तुतीकरण गर्नुभएको थियो ।
गुहेंली सञ्चार सहकारी संस्था लिमिटेडका अध्यक्ष खिम बहादुर कार्कीको अध्यक्षतामा सम्पन्न कार्यक्रममा उपाध्यक्ष गिता हमालले स्वागत मन्तव्य, सचिव सुर्य थापा र प्रवन्धक प्रसाद थापाले संचालन गर्नुभएको थियो ।
