बागलुङ, ३० जेठ । बागलुङलाई पूर्णखोप सुनिश्चितता तथा दिगोपना जिल्ला घोषणा गरिएको छ ।
दशवटै पालिकाका सबै बालबालिकाहरुले पूर्ण खोप लगाएपछि बागलुङलाई जिल्ला घोषणा गरिएको हो ।
गण्डकी प्रदेशका स्वास्थ्य मन्त्री कृष्ण प्रसाद पाठकले पूर्ण खोप सुनिश्चितता तथा दिगोपना जिल्ला घोषणा गरे ।
कार्यक्रमलाई सम्बोधन गर्दै गण्डकी प्रदेशका स्वास्थ्यमन्त्री कृष्ण पाठकले खोप अभियान दिगोपना महत्वपूर्ण विषय भएकाले यसलाई कायम राख्न तीनै तहका सरकार हातेमालो गरी अघि बढ्नुपर्नेमा बताए ।
बालबालिकालाई तोकिएको समयमा खोप दिनुका साथै पोषणयुक्त खानाको प्रबन्धले मात्र स्वस्थ्य राख्न सकिने भएकाले त्यसतर्फ सजग रहन मन्त्री पाठकले आग्रह गरे ।
गण्डकी प्रदेशलाई स्वास्थ्य क्षेत्रमा अब्बल बनाउन अस्पतालहरुको स्तरोन्नति र पालिका स्तरीय अस्पताललाई प्रदेश सरकार मातहतमा ल्याउने कामको थालनी भएको बताउँदै मन्त्री पाठकले स्तरोन्नति गरिएका अस्पताललाई दक्ष जनशक्ति, पर्याप्त उपकरण र पूर्वाधार सम्पन्न बनाई जनतालाई स्थानीयस्तरमै सर्वसुलभ स्वास्थ्य सेवा प्रदान गर्न प्रदेश सरकार डटिरहेको बताए । उनले धौलागिरि प्रादेशिक अस्पताललाई एक सय शैयामा स्तरोन्नति गरिएसंगै यसै वर्षदेखि नर्सिङ विषयको पढाई शुरु गरिने जानकारी दिए ।
धौलागिरि अस्पताललाई मेडिकल कलेजको रुपमा विकास गर्ने प्रदेश सरकारको दीर्घकालिन योजना रहेको पाठकले सुनाए । ‘‘प्रदेशमा आवश्यक जनशक्ति आपूर्ति गर्न धौलागिरि अस्पतालमा नर्सिङ, गोरखा अस्पतालमा एचएको पढाउने काम यसै वर्षबाट शुरु गर्नेगरी बजेटको समेत व्यवस्था गरिएको छ’’ मन्त्री पाठकले भने ।
आगामी वर्ष नवलपुर अस्पतालमा प्राविधिक शिक्षाको पठनपाठन हुने गरी काम समेत अघि बढिसकेको मन्त्री पाठकको भनाई थियो । आधारभूत जनतामा केन्द्रित रहेर प्रदेशको बजेट तयार भएको जानकारी दिँदै पाठकले बजेटले सबै क्षेत्रलाई सम्बोधन गर्ने बताए ।
प्रदेश जनस्वास्थ्य कार्यालय बागलुङका क्षय कुष्ठ निरिक्षक देव प्रकाश घिमिरेका अनुसार, ताराखोला गाउँपालिकाका १६ देखि २३ महिनाका ७०, बरेङका ५ सय ९, काठेखोलाका २ सय ७, बडिगाडका ३ सय ५५, निसीखोलाका ३ सय ७७ र तमानखोला गाउँपालिकाका १ सय १४, बागलुङ नगरपालिकाका ४ सय ५९, जैमिनीका २ सय २६, गलकोटका ३ सय २७ र ढोरपाटन नगरपालिकाका ४ सय ५४ जना बालबालिकाले पूर्ण खोप लगाएका छन् ।
यस्तै, ताराखोलाका शुन्यदेखि १५ महिनाका १ सय २३, बरेङका १ सय ३६, काठेखोलाका २ सय २७, बडिगाडका ४ सय ४०, निसीखोलाका ४ सय ५२, तमानखोलाका १ सय ६३, बागलुङ नगरका ६ सय ६३, जैमिनीका ३ सय १३, गलकोटका ४ सय २७ र ढोरपाटनका ६ सय ८ जना बालबालिकाले नियमित खोप लगाइरहेको घिमिरेले जानकारी दिए ।
कार्यक्रममा पूर्ण खोप अभियानमा उत्कृष्ट कार्य गर्ने दश पालिकाका दश जना स्वास्थ्यर्कर्मी र स्वास्थ्य संस्थालाई समेत सम्मान गरिएको थियो ।
यसअघि म्याग्दी र मनाङलाई पूर्ण खोप सुनिश्चितता तथा दिगोपना जिल्ला घोषणा गरिएको छ ।
जिल्लाका १३ देखि २३ महिनाका ३ हजार ९८ जना बालबालिकाले पूर्ण खोप र शुन्यदेखि १५ महिना उमेर समूहका ३ हजार ५ सय ५२ जना बालबालिकाले खोप लगाइरहेका छन् ।
