काठमाडौँ । नेपाली सेनाले काठमाडौँ उपत्यकामा दिउँसो लागू भएको कर्फ्यु हटाएको छ। अब कर्फ्यु आज बेलुकी ७ बजेदेखि भोलि बिहान ६ बजेसम्म मात्र लागू हुनेछ।
यससँगै सेनाले निषेधाज्ञा पनि खुकुलो बनाएको छ। सेनाले जारी गरेको सूचनाअनुसार आज बिहान ११ बजेदेखि बेलुकी ५ बजेसम्म मात्र निषेधाज्ञा जारी रहनेछ। बिहान ११ बजेसम्म भने निषेधाज्ञा पूर्ण रूपमा हटाइएको थियो।
जेनजी आन्दोलनका क्रममा हिंसा भएसँगै लगाइएका कडा सुरक्षा व्यवस्थामा केही लचकता देखाइएको हो। निषेधाज्ञा र कर्फ्यु खुकुलो बनाइएपछि काठमाडौँ उपत्यकाको जनजीवन सामान्य बन्दै गएको छ। आज बिहान सवारीसाधनहरूको सङ्ख्या अघिल्लो दिनभन्दा बढी देखिएको छ।
भदौ २३ गतेको प्रदर्शन हिंसात्मक बनेपछि सरकारले सामाजिक सञ्जालमा प्रतिबन्ध लगाएको थियो। त्यसपछिका घटनामा कम्तीमा ३६ जनाको मृत्यु र सयौँ घाइते भएपछि भदौ २४ गते रातिदेखि सेनाले सुरक्षा कमान्ड सम्हालेको हो।
सुरुमा देशभर कर्फ्यु लगाइए पनि अहिले उपत्यकामा मात्र सीमित गरिएको छ। उपत्यका बाहिरका केही जिल्लामा भने जिल्ला प्रशासन कार्यालयमार्फत कर्फ्यु र निषेधाज्ञा जारी गरिएको छ।
