बागलुङ , २७ भदौ । बागलुङमा निषेधाज्ञाकाे समय थपिएको छ ।
जिल्ला प्रशासन कार्यालय बागलुङले आज एक सुचना जारी गर्दै निषेधाज्ञाकाे समय थप गरेको हो ।
आज बिहान ११ बजेदेखि अर्को आदेश नभएसम्मका लागि बागलुङ नगरपालिकाका वडा नं.१, २, ३ र ४ गलकोट नगरपालिकाको वडा नं. ३, ५ र ६ जैमिनी नगरपालिका वडा नं. १ को सबै क्षेत्र, ढोरपाटन नगरपालिका वडा नं. १,२ र ३ को सबै क्षेत्र, बडिगाड गाउँपालिकाको मध्यपहाडी लोकमार्ग क्षेत्रमा निषेधाज्ञा जारी गरिएको हो ।
स्थानीय प्रशासन ऐन, २०२८ को दफा ६ को उपदफा (३क) बमोजिम निषेधाज्ञा जारी गरिएको छ। निषेधाज्ञा जारी गरिएको क्षेत्रमा ५ (पाँच) जनाभन्दा बढी व्यक्ति भेला जम्मा भई अनसन, धर्ना, घेराउ, जुलुस, प्रदर्शन तथा सभा जस्ता कार्यक्रम गर्न निषेध गरिएको छ।
उक्त अवधिमा यस आदेशको अवज्ञा गर्ने वा आदेशको पालना गर्ने गराउने कार्यमा अवरोध गर्ने जो सुकै उपर प्रचलित कानून बमोजिम कारवाही हुने जिल्ला प्रशासन कार्यालयले जनाएको छ ।
