बागलुङ २८ भदौ । बागलुङका जेन्जी युवाले व्यवस्था उल्टाउन नभई नागरिकको अवस्था फेर्न आन्दोलन गरेको बताएका छन् ।
शनिबार सदरमुकाम आयोजित पत्रकार सम्मेलनमा उनीहरुले लोकतान्त्रिक मूल्य, मान्यता, सहिष्णुता र पारदर्शिताका पक्षमा सँधै रहिरहने जनाएका हुन् ।
जेन्जी आन्दोलनका अगुवा अभिषेक कटुवालले जेन्जी पुस्ता देशको भविष्य निर्माण गर्ने पिढीँ भएको उल्लेख गर्दै सुशासन, समान अवसर र दिगो विकासका लागि जेन्जी पुस्ताले विद्रोह गरेको बताए ।
उनले पुरानो पुस्ताले गरेको गलत कामको परिणाम जेन्जी पुस्ताले भोग्नुपरेको सुनाए । कटुवालले संविधान र लोकतन्त्रप्रति जेन्जी पुस्ता प्रतिबद्ध रहेको बताए । जेन्जीको माग अनुसार बनेको नयाँ सरकारले घोषणा गरेको निर्वाचन सफल पार्न सबै पक्षको सहयोग चाहिने उनको भनाइ छ । “पुराना राजनीतिक दललाई पनि सच्चिएर चुनावमा जाने र नयाँ जनादेश लिने अवसर आएको छ”, उनले भने ।
देशमा मौलाएको भ्रष्टचार, बेथिति र असमानताकाविरुद्ध जेन्जी युवाले गरेको आन्दोलन सफल भएसँगै देशले नयाँ बाटो लिएको कटुवालले बताए । “पुरानो पुस्ताले भ्रष्टचार गर्ने, देश बिगार्ने, बेथितिलाई मलजल गर्ने तर त्यसको पीडा र असर हाम्रो पुस्ताले व्यहोर्नुपर्र्ने अवस्था छ”, उनले भने, “देशको अवस्था बिग्रनुमा हाम्रो कुनै भूमिका छैन, हामी निर्दोष पुस्ता हौँ ।”
कटुवालले जेन्जीको अभियान केबल विरोध र मागमा मात्र सीमित नरहेको भन्दै यो पुस्ताले परिवर्तनको आन्दोलनमा आफ्नो भूमिका र नेतृत्व स्थापित गर्ने अवसरका रुपमा लिइएको बताए । अर्का जेन्जी युवा रोहन भण्डारीले जिल्लामा जेन्जी आन्दोलन शान्तिपूर्ण रुपमा सम्पन्न भएको बताए ।
जेन्जीले मात्र सुरु गरेको आन्दोलनमा नागरिक समर्थन प्राप्त भएको र त्यो नागरिकको समझदारी, सहभागिता र सहयोगले मात्र सम्भव भएको उल्लेख गरे । जेन्जी बागलुङले जिल्लामा भएको आन्दोलनलाई जिम्मेवार र शान्तिपूर्ण बनाउन सहयोग गर्ने बागलुङवासी जनसमुदाय, सरोकारवाला निकाय, सुरक्षाकर्मी, सञ्चारकर्मीलगायतलाई विज्ञप्तिमार्फत आभार व्यक्त गरेको छ ।
