काठमाडौँ । जेनजी युवाको आन्दोलनका क्रममा ज्यान गुमाएका नागरिकलाई सरकारले शहीद घोषणा गरेको छ। प्रधानमन्त्री सुशीला कार्कीले पदभार ग्रहण गरे लगत्तै सो निर्णयमा हस्ताक्षर गरेकी हुन्।
प्रधानमन्त्रीको निर्देशनअनुसार प्रत्येक मृतकका परिवारलाई १०–१० लाख रुपैयाँ क्षतिपूर्ति उपलब्ध गराइनेछ। साथै आन्दोलनमा घाइते भएकाहरूको सरकारले निःशुल्क उपचार गर्ने व्यवस्था गर्ने भएको छ।
मुख्यसचिव एकनारायण अर्यालका अनुसार आन्दोलनमा प्रदर्शनकारी ५९ जना, कैदी बन्दी १० जना र सुरक्षाकर्मी ३ जनाको मृत्यु भएको छ। यसरी जम्मा ७२ जनाको ज्यान गएको हो। यस्तै १३४ जना प्रदर्शनकारी र ५७ जना सुरक्षाकर्मी घाइते भएका छन्।
प्रधानमन्त्री कार्कीले आन्दोलनका क्रममा प्राण गुमाउनेहरूलाई श्रद्धाञ्जली अर्पण गर्दै शान्ति, सहअस्तित्व र लोकतान्त्रिक मूल्यको रक्षा गर्दै अघि बढ्ने प्रतिबद्धता व्यक्त गरेकी छन्।
