बागलुङ, २ असोज । संविधान दिवसको अवसरमा बागलुङमा फरक क्षमता भएका विद्यार्थीहरुलाई खेलकुद तथा शैक्षिक सामाग्री हस्तान्तरण गरिएको छ ।
शिक्षा विकास तथा समन्वय इकाई र बागलुङ नगरपालिका शिक्षा शाखाको समन्वयमा बिहिबार फरक क्षमता भएका विद्यार्थीहरुलाई हितकर हुने शैक्षिक तथा खेलकुद सामाग्री वितरण गरिएको हो । धौलागिरी बहिरा आवासिय माध्यमिक विद्यालयका विद्यार्थीहरुलाई दुई थान क्यारम्बोर्ड, दुई थान भलिवल, दुई थान ज्यामिती बक्स वितरण गरिएको थियो ।
सामाग्री वितरण कार्यक्रममा बोल्दै जिल्ला समन्वय समिति बागलुङका प्रमुख अमर बहादुर थापाले अपाङ्गता भएका विद्यार्थीउहरुलाई पनि खेलकुदमा जोड्नको लागि खेल सामाग्री वितरण गरिएको बताउनुभयो ।
संविधान दिवसको अवसरमा बागलुङमा तीन दिने कार्यक्रम गरि मनाइदै छ । संविधान दिवसका मुलसमारोह समितिका संयोजक समेत रहेका थापाले बिहिबार बिहान नेपाल बार एसोशियसनको संयोजनमा धौलागिरी प्रादेशिक अस्पतालका विरामीहरुलाई फलफुल वितरण गरिएको छ ।
यस्तै आज उद्योग वाणिज्य संघको संयोजनमा मानव सेवा आश्रममा खाद्यान्न सामाग्री वितरण गरिने र गैर सरकारी संस्था महासंघको संयोजनमा बागलुङ कारागारका कैदी बन्दीहरुलाई खेलकुद सामाग्री वितरण गर्ने कार्यक्रम रहेको संयोजक थापाले बताउनुभयो ।
शुक्रबार संविधान दिवसको दिन सहिद पार्कमा सहिदहरु प्रति माल्यार्पण गरिने र साँझ ऐतिहासिक पार्कमा सामुहिक दिप प्रज्वलन गरिने भएको छ । यस्तै बिहिबार, शुक्रबार र शनिबार तीन दिन सवै कार्यालय र घर घरमा दिप प्रज्वलन गरिने बताइएको छ ।
