१९ असोज, इलाम । अविरल वर्षासँगै खसेको भीषण पहिरोले इलाममा ठुलो जनधनको क्षति भएको छ। आइतबार बिहानसम्म विभिन्न स्थानमा खसेका पहिरोका कारण कम्तीमा १८ जनाको मृत्यु भएको पुष्टि भएको छ भने कयौँ जना बेपत्ता रहेको कोसी प्रदेश प्रहरीले जनाएको छ।
कोसी प्रदेश प्रहरी प्रवक्ता एसएसपी दीपक पोखरेलका अनुसार इलामका सूर्योदय नगरपालिका, देउमाई नगरपालिका, माङसेबुङ गाउँपालिका, फाकफोकथुम गाउँपालिका र इलाम नगरपालिकामा सबैभन्दा बढी क्षति पुगेको छ।
सूर्योदय नगरपालिका–१ मानेभञ्ज्याङमा ५ जनाको, माङसेबुङ गाउँपालिका–१ पाटीगाउँमा ३ जनाको, देउमाई नगरपालिका–५ ढोरेमा १ जना, धुसुनेमा २ जनाको, फाकफोकथुम गाउँपालिका–३ रातमाटेमा १ जना र इलाम नगरपालिका–६ घोसगाउँमा ६ जनाको मृत्यु भएको प्रहरीले पुष्टि गरेको छ।
इलाम नगरपालिका–६ घोसोस्थित डम्बरबहादुर तामाङको घर पहिरोले पुरिँदा घरभित्र रहेका ६ जनाको मृत्यु भएको हो।
त्यस्तै, राजु क्षेत्रीको घर पहिरोले पुर्दा ५ जनाको मृत्यु भएको प्रहरीले जनाएको छ।
देउमाई–५ घुसेनीमा पहिरोले २ जनाको ज्यान लिएको छ भने ३ जना बेपत्ता छन्।
प्रदेश प्रहरी कार्यालयका अनुसार, माङसेबुङ गाउँपालिका–१ मा एक जना गर्भवतीसहित दुई जना गम्भीर घाइते भएका छन्। उद्धारका लागि नेपाली सेनाको टोली घटनास्थलतर्फ पुगेको छ, तर खराब मौसमका कारण उद्धारमा कठिनाइ भइरहेको बताइएको छ।
प्रमुख जिल्ला अधिकारी सुनिता नेपालका अनुसार, हेलिकप्टरमार्फत उद्धारको प्रयास गरिएको भए पनि मौसम प्रतिकूल हुँदा अवतरण गर्न नसकिएको छ।
जिल्ला प्रहरी कार्यालय इलामका अनुसार, अहिले पनि केही स्थानमा पहिरो खस्ने क्रम रोकिएको छैन।
सशस्त्र प्रहरी, नेपाल प्रहरी र स्थानीय बासिन्दा उद्धार तथा राहत कार्यमा खटिएका छन्।
लगातारको वर्षाका कारण ग्रामीण सडकहरू अवरुद्ध भएका छन् र जोखिम क्षेत्रका बासिन्दालाई सतर्क रहन प्रशासनले आग्रह गरेको छ।
प्रशासनले मृतकको सङ्ख्या अझ बढ्न सक्ने अनुमान गरेको छ।
