बागलुङ , २५ असोज । बागलुङको ढोरपाटन नगरपालिकाका नगरप्रमुख देवकुमार नेपाली र उनकी श्रीमती छेला नेपाली विरुद्ध सरकारले सम्पत्ति शुद्धीकरणको मुद्दा दर्ता गरेको छ । ईमेज बचत तथा ऋण सहकारी संस्थाका संस्थापक अध्यक्ष समेत रहेका नेपाली अहिले सहकारी ठगी अभियोगमा पुर्पक्षका लागि थुनामा रहेका छन् ।
जिल्ला सरकारी वकिलको कार्यालय बागलुङले नेपाली विरुद्ध रु.एक अर्ब ५८ करोड विगो मागदावी सहित मुद्दा दायर गरेको हो । उनीमाथि बागलुङको इमेज सहकारी संस्थाको रकम हिनामिना गरी गैरकानूनी सम्पत्ति कमाएको आरोप छ । यस्तै उनकी श्रमती छेला नेपाली बिरुद्ध रु. ६ करोड ९८ लाख विगो मागदावी मुद्दा दर्ता गरिएको हो ।
पहिले सहकारी ठगीमा मात्र मुद्दा दर्ता गरिएका नेपालीलाई बिहीबार सहकारी ठगीलाई आधार बनाएर जिल्ला अदालत बागलुङमा सम्पत्ति शुद्धीकरण मुद्दा पनि दर्ता गरिएको सरकारी वकिल कार्यालय बागलुङका जिल्ला न्यायाधिवक्ता पूर्णप्रसाद शर्माले जानकारी दिए ।
सहकारी ठगी छानबिन प्रतिवेदन र प्रहरीले सहकारी ठगी, सम्पत्ति शुद्धीकरण र संगठित अपराध मुद्दा चलाउन सिफारिस गरिएको भएपनि यसअघि सहकारी ठगीमा मात्र मुद्दा दर्ता गरिएको थियो ।
नेपाली ११ असोज, २०८१ मा उनी भारतमा पक्राउ परेका थिए । त्यसपछि नेपाल ल्याइएका उनी अदालतमा पेश भएपछि पुर्पक्षका लागि थुनामा छन् । नेपालीकी श्रीमती छेला नेपाली भने फरार रहेकी छन् ।
सम्पत्ति शुद्धीकरण अनुसन्धान विभागले सम्पती शुद्धिकरण निवारण ऐन २०६४ अनुसार नेपाली लगायतमाथि १७ जनामाथि सम्पत्ति शुद्धीकरण लगायतमा मुद्दा चलाउनुपर्ने राय सहितको प्रतिवेदन तयार गरेको थियो । त्यही प्रतिवेदनका अनुसार नेपाली दम्पतीलाई सम्पती शुद्धिकरणको मुद्धा चलाइएको छ ।
