बागलुङ, ३ जेठ । कालिका भगवती मन्दिरले वैशाख महिनामा ६१ लाख रुपियाँ आम्दानी गरेको छ ।
नेपालकै प्रसिद्ध कालिका मन्दिरमा वैशाख महिनामा ६१ लाख ७८ हजार २१० रुपैयाँ आम्दानी गरेको कालिका भगवती गुठी व्यवस्थापन समितिले जनाएको छ ।
समितिका अनुसार भेटीबाट मात्रै ३६ लाख ८७ हजार ५४५ रुपैयाँ संकलन भएको छ । त्यसैगरी परेवाबाट १० लाख २९ हजार ५००, बोकाबाट १ लाख ३६ हजार ३५५, भाडाबाट ९ लाख ७१ हजार १४० तथा आर्थिक सहयोगबाट २ लाख ४ हजार २२० रुपैयाँ आम्दानी भएको छ ।
त्यस्तै चामलबाट ९३ हजार, पण्डितबाट २५ हजार ५००, कुखुराबाट ७ हजार ८ सय, विवाहबाट १४ हजार, व्रतबन्धबाट ३ हजार तथा राँगाबाट २ हजार ८ सय रुपैयाँ आम्दानी भएको जनाइएको छ ।
कालिका भगवती गुठी व्यवस्थापन समिति बागलुङले मन्दिरमा वैशाख महिनामा ११ लाख ५८ हजार ५४० रुपैयाँ खर्च भएको जनाएको छ ।
खर्चतर्फ तलबमा ४ लाख ३१ हजार, पूर्वाधार निर्माणमा ६ लाख २ हजार ८००, बिजुली खर्चमा ३९ हजार ४० र खाद्यान्न तथा आवासमा ६० हजार रुपैयाँ खर्च गरिएको छ ।
समितिका अनुसार वैशाख महिनामा खर्च कटाएर ५० लाख १९ हजार ६७० रुपैयाँ बचत भएको छ । मन्दिर व्यवस्थापन, पूर्वाधार विकास तथा धार्मिक गतिविधिका लागि भेटी तथा सहयोग रकम प्रयोग हुँदै आएको समितिले जनाएको छ ।
