बागलुङ, ९ मङ्सिर । बागलुङमा लैङ्गिक हिंसा विरुद्धको १६ दिने अभियान सुरु भएको छ ।‘प्रविधिको सही प्रयोग गरौँ, लैङ्गिक हिंसा अन्त्य गरौँ’ भन्ने मूल नाराका साथ सुरु भएको हो । अभियानको पहिलो दिन मङ्गलबार बागलुङ बजारमा सचेतनामूलक प्रभातफेरीको आयोजना गरिएको हो ।
बागलुङ नगरपालिकाद्वारा आयोजित उक्त कार्यक्रममा विभिन्न विभिन्न संघसंस्था, राजनीतिक दलसम्बद्ध महिला संगठनका प्रतिनिधि, आमा समूह, जनप्रतिनिधि,प्रहरी,सञ्चारकर्मी लगायतको सहभागिता रहेको थियो ।
समिक्षालयचोकबाट सुरु भएको प्रभातफेरी बजार परिक्रमा गरी लोकतान्त्रिक चोकमा पुगेर कोणसभामा परिणत भएको थियो ।
कोणसभामा गण्डकी प्रदेशसभा सदस्य कुसुम बुढामगर र प्रमुख जिल्ला अधिकारी कुमानसिँह गुरुङले अभियानको महत्व र औचित्यका बारेमा भनाइ राखेका थिए ।
नगरप्रमुख बसन्तकुमार श्रेष्ठको अध्यक्षतामा कार्यक्रम सम्पन्न भएको थियो ।
अभियान अन्तर्गत १६ दिनसम्म लैङ्गिक हिंसा न्यूनीकरण सम्बन्धी विविध रचनात्मक क्रियाकलाप सञ्चालन गरिने नगरपालिकाले जनाएको छ ।
