बागलुङ, पुस १२ गते । वेसाहारा मानिसको संरक्षण र पालनपोषण गरिरहेको मानव सेवा आश्रम बागलुङमा बागलुङका समाजसेवी लालचन्द्र राजभण्डारीले एक लाख रुपियाँको अक्षयकोष स्थापना गर्नुभएको छ । बागलुङमा लामो समयदेखि सामाजिक क्षेत्रमा सक्रिय राजजभण्डारीले आफ्नो ७७ औं जन्मदिनको अवसरमा अक्षयकोष स्थापना गर्नुभएको हो ।
केही वर्षदेखि बागलुङमा वेसाहारा बनेका, मानसिक सन्तुलन गुमाएर सडकमा भौतारिरहेका मानिसहरुको संरक्षकत्व लिदै उनीहरुको पालनपोषण गरिरहेको आश्रममा अक्षयकोष स्थापना गर्नुभएको हो । आफ्नो घर अगाडि केही युवाहरुको सक्रियतामा सडकमा अपहेलित जीवन विताइरहेका मानिसहरुको संरक्षकत्वको काम गरिरहेकाले उनीहरुलाई प्रोत्साहन होस भन्ने उद्देश्यले अक्षयकोष स्थापना गरेको बताउनुभयो ।
आफू सामाजिक क्षेत्रमा सक्रिय हुँदै ७७ वर्ष पुगेको भन्दै राजभण्डारीले बाचुन्जेल सामाजिक क्षेत्रमै सक्रिय रहने प्रतिबद्धता जनाउँदै आफूले स्थापना गरेको अक्षयकोषबाट प्राप्त हुने रकम मानव सेवा आश्रमले आफ्नो दैनिक काममा खर्च गर्न सक्ने बताउनुभयो । ‘मैले आफ्नो जन्मदिनका अवसरमा एक लाख रुपियाँ मानव सेवा आश्रममा अक्षयकोष स्थापनाका लागि प्रदान गरेको छु, यो अक्षयकोषको व्यवस्थापन पूर्ण रुपमा मानव सेवा आश्रमको हुनेछ यसमा आफू र आफ्नो परिवारको कुनै हस्तक्षेप हुनेछैन ।’ राजभण्डारीले भन्नुभयो ।
मानव सेवा आश्रममा राजभण्डारीको ७७ औं जन्मदिन मनाउँने कार्यक्रममा मानव सेवा आश्रमका अभिभावक सुमिरा लामाले नेपाललाई सडक मानव मुक्त बनाउँने अभियानमा आफूहरु लागिरहेकाले सो अभियानमा साथ दिन सबैलाई आग्रह गर्नुभएको थियो । आफूहरुले बागलुङमा आश्रम स्थापना गरेपछि धेरैको साथ र सहयोग रहेको भन्दै त्यही साथ र सहयोगका कारण बागलुङ बजारका सडकहरुमा देखिने वेसाहारा तथा मानसिक सन्तुलन गुमाएका मानिसहरुलाई आफूहरुले संरक्षकत्व दिन सकिएको बताउनुभयो ।
कार्यक्रममा समाजसेवी तथा बागलुङ नगरपालिकाका पूर्व उपप्रमुख पद्यमचन्द्र राजभण्डारी, समाजसेवी रघुनाथ राजभण्डारी, मुलपानी माध्यामिक विद्यालयका पुर्व प्रअ मेघराज पाण्डे, नेपाल पत्रकार महासंघ बागलुङका सचिव राम थापा, सल्लाहकार कोपिला कँडेल लगायतले बोल्नुभएको थियो । कार्यक्रम मानव सेवा आश्रमका सञ्चालक मनिष रायमाझीको अध्यक्षता, देवबहादुर श्रेष्ठको स्वागत र राजेशचन्द्र राजभडारीको सञ्चालनमा सम्पन्न भएको थियो ।
