चन्द्र गणेश पौडेल ।
बागलुङ, कात्तिक १३ । बागलुङ नगरपालिका- १४ नारायणस्थान र पर्वतको कुश्मा जोडिएको विश्वकै दोस्रो अग्लो बञ्जीमा बयोबृद्ध क्यानडियन नागरिक मिसेल जुत्रासले बञ्जी गरेका छन् । ८४ वर्षीय मिसेल जुत्रासले केही दिन अगाडी एड्भेन्चर हवको रुपमा परिचित ‘द क्लिफ’पुगेर बञ्जी, स्विङ, स्काइ साइक्लिङ, स्काइ ग्लाइडिङ लगायतका साहसिक खेलहरुको मज्जा लिनुभएको थियो ।
जुत्रासले बञ्जी तथा अन्य खेलहरु खेलेको भिडियो द क्लिफले आफ्नो आधिकारिक फेसबुक पेज, टिकटकबाट सार्वजनिक गरेको छ । सार्वजनिक भएको भिडियोमा जुत्रास युवा जोसका साथ बन्जी प्रवेश गरेका थिए । बन्जी पुगेर कर्मचारीहरुसँग हाँसो ठठ्टा गरेका जुत्रासले बन्जी गर्नुपूर्व रोमाञ्चित हुँदै नृत्य समेत गरेको देख्न सकिन्छ ।
जुत्रास द क्लिफमा सबैभन्दा बढी उमेरमा बन्जी गर्ने नागरिकको रुपमा रेकर्ड कायम गर्नुभएको द क्लीफका अध्यक्ष राजु कार्कीले जानकारी दिनुभयो । कार्कीका अनुसार यसअगाडी ६६ वर्षीय बिदेशी महिलाले बञ्जी गर्नुभएको थियो । बञ्जीपछि निकै उत्साहित रहेका क्यानडिएन नागरिक मिसेलले क्लिफमा आफूले निक्कै मज्जा लिएको भिडियोमा बताएका छन् ।
राजु कार्कीको परिकल्पना र नेतृत्वमा कालीगण्डकी नदीको खोँचमाथि पर्वत र बाग्लुङ बलेवा जोड्ने गरी बनाइएको द क्लिफमा विश्वकै अग्लो स्विङ र विश्वकै दोस्रो अग्लो बन्जी जम्प निर्माण गरिएको छ । बन्जी र स्विङसँगै क्लिफमा रिसोर्ट, विश्वकै अग्लो ब्यवसायिक स्काइ साइक्लिङ, स्काइ क्याफे, वाल क्लाइम्बिङ, गुलेली पिङ, क्रेजी ब्रीज, स्काइ ग्लाइडिङ, स्काइ क्याफे लगायत गतिविधि सञ्चालनमा छन् ।
भिडियो स्रोत: द क्लिफको फेसबुक पेज
