बागलुङ । चिल्ड्रेन लाईफ स्पोर्ट्स क्लबको आयोजना र चिल्ड्रेन लाईफ इङलिस बोर्डिङ स्कूलको सह-आयोजनामा भोलि देखि हुने तेस्रो चिल्ड्रेन लाईफ कप फुटबल प्रतियोगिताको आज पत्रकार सम्मेलन गरि ट्रफी सार्वजनिक गरेको छ ।
सार्वजनिक गर्दै क्लबका अध्यक्ष एबम चिल्ड्रेन लाईफ इङ्लिस बोर्डिङ स्कूलका प्रधानध्यापक नवराज श्रेष्ठले राष्ट्रिय खेलाडी उत्पादन गर्ने सुरुवाती उद्गमस्थल विद्यालय भएकाले विद्यालय केन्द्रित प्रतियोगितालाई निरन्तरता दिइएको बताउनुभयो । उहाँले २०७५ सालमा प्रथम र २०७६ सालमा दोस्रो चिल्ड्रेन लाईफ कप प्रतियोगिता सम्पन्न गरिएपनि केहि वर्ष कोभिड र क्लबको आन्तरिक कारणले प्रतियोगिता संचालन गर्न नसकिए बताउँदै यस वर्षदेखि पुनः निरन्तरता दिन लागिएको जानकारी दिनुभयो ।
प्रतियोगिताको विजेता र उपविजेताले क्रमशः ४४ हजार ४ सय ४४ रुपैयाँ र २२ हजार २ सय २२ रुपैयाँ नगद, ट्रफी, मेडल र प्रमाणपत्र प्राप्त गर्ने छन् । प्रतियोगितामा विद्यागत तर्फ उत्कृष्ट गोलरक्षक, डिफेन्डर, मिडफिल्डर, फरवार्ड सहित प्रत्येक खेलको म्यानअफदि म्याच, सर्वोत्कृष्ट खेलाडी र उच्च गोलकर्तालाई पुरस्कृत गरिने छ भने प्रतियोगितामा १० टिमको सहभागिता रहने आयोजकले जनाएको छ ।
