बागलुङ , २ चैत । बागलुङको कालीमाटीमा भएको स्वास्थ्य शिविरबाट ४१० जना नागरिक लाभान्वित भएका छन् ।
रोटरी क्लब अफ बागलुङ र रोटरी क्लब अफ मिट टाउन पोखराको आयोजनामा बागलुङ नगरपालिका–७ कालीमाटीमा आयोजना गरिएको निःशुल्क स्वास्थ्य शिविरबाट ४१० जना नागरिकले विशेषज्ञ सेवा लिएको रोटरी क्लब अफ बागलुङका अध्यक्ष रामकृष्ण शर्माले जानकारी दिए ।
शिविरको शुभारम्भ गर्दै वडा अध्यक्ष मेघराज गैरेले गाउँमै विशेषज्ञ सेवा प्रदानका लागि रोटरी क्लबले गरेको योगदानको चर्चा गरेका थिए ।
रोटरी क्लब अफ बागलुङका अध्यक्ष रामकृष्ण शर्माले शिविरमा स्त्रीरोग, हाड जोर्नी तथा नसा रोग, मिर्गौला तथा मुत्र रोग, आँखा, नाक, कान तथा घाटी रोग, पेट मुटु तथा छाती रोग र प्रयोगशाला सेवा प्रदान गरिएको जानकारी दिए । उनले गाउँमै विशेषज्ञ सेवा प्रदान गर्दा नागरिकलाई रोगको पहिचान, उपचार तथा खर्च र समय बचत भएको बताए ।
शिविरमा स्त्री रोग विशेषज्ञ डा. चण्डीका न्यौपाने, वरिष्ठ सर्जन डा. भोजराज न्यौपाने र हाडजोर्नी तथा नसा रोग विशेषज्ञ डा.पविन थापा लगायतका स्वास्थ्यकर्मीले सेवा दिएको रोटरी क्लब आफ मिट टाउन पोखराका अध्यक्ष सुर्य नारायण बरालले जानकारी दिए ।
