काठमाडौँ । राष्ट्रिय स्वतन्त्र पार्टी (रास्वपा) की नेतृ तथा पूर्व शिक्षामन्त्री सुमना श्रेष्ठले पार्टी छाडेको घोषणा गरेकी छन्।
श्रेष्ठले आइतबार बिहान पार्टीका केन्द्रीय सदस्यहरूको ह्वाट्स एप ग्रुपमार्फत आफ्नो निर्णय सार्वजनिक गर्दै नेतृत्वले निरन्तर गल्ती गर्दा पनि त्यसलाई कहिल्यै स्वीकार नगर्ने, आलोचना गर्नेहरूलाई मिडिया ट्रायलमार्फत कमजोर पार्ने र पार्टीभन्दा नेतालाई माथि राख्ने प्रवृत्तिप्रति असन्तुष्टि जनाएकी छिन्।
उनले लेखेकी छन्, “गल्तीमाथि गल्ती गर्न सकिन्छ तर त्यसलाई स्वीकार नगर्ने र त्यसको बोझ सबैलाई बोक्न लगाउने प्रवृत्ति स्वीकार्य छैन। आलोचकहरूलाई सजाय दिने संस्कार र नेतालाई देशभन्दा माथि राख्ने प्रवृत्ति रहेकाले म पार्टी छाड्दैछु।”
श्रेष्ठले केही महिना अघि रास्वपाको सह-महामन्त्री पदबाट राजीनामा दिएकी थिइन्। समानुपातिक प्रणालीमार्फत सांसद बनेकी उनी प्रचण्ड नेतृत्वको सरकारमा शिक्षामन्त्रीसमेत भएकी थिइन्।
यसबिचमा उनी प्रधानमन्त्री सुशीला कार्कीको शपथ ग्रहण कार्यक्रममा उपस्थित भएपछि मन्त्री बन्ने चर्चा चलेको थियो। तर, निकट स्रोतका अनुसार श्रेष्ठ अहिले कुनै पार्टीमा जाने वा सरकारमा प्रवेश गर्ने तयारीमा छैनन्। उनी बाहिरैबाट सरकारलाई सहयोग गर्ने मनसायमा रहेको बुझिएको छ।
रास्वपाका प्रवक्ता मनिष झाले भने, सुमनाको राजीनामाबारे ग्रुपमा जानकारी पाएको तर पार्टीमा आधिकारिक पत्र भने अहिलेसम्म प्राप्त नभएको बताएका छन्।
