बागलुङ, १३ मंसिर । नेकपा एमाले बागलुङले आगामी मंसिर २७ गते देखि २९ गते सम्म हुने ११ औं महाधिवेशनका लागि बागलुङले सर्वसम्मत प्रतिनिधि छनोट गरेको छ ।
बागलुङको सङ्घीय निर्वाचन क्षेत्र नं. १ बाट ६ जना, क्षेत्र नं. २ बाट ४ जना र दलित कलष्टरबाट १ जना महाधिवेशन प्रतिनिधि सर्वसम्मत चयन हुनुभएको हो ।
राष्ट्रिय महाधिवेशनका लागि बागलुङ क्षेत्र नं. १ बाट प्रतिनिधित्व गर्ने ६ जना महाधिवेशन प्रतिनिधिका लागि ३९ जनाले नाम दर्ता गर्नुभएको थियो । आकाङ्क्षीहरु सवच दुई दिनसम्म सर्वसम्मत हुन नसकेपछि शुक्रबार नेतृत्वलाई जिम्मा दिइएको थियो ।
नेतृत्वले क्षेत्र नम्बर १ मा खुल्लातर्फ ३ जनामा जिल्ला अध्यक्ष हिराबहादुर केसी, जिल्ला सचिव गणेश थापा र प्रदेश सदस्य लाल बहादुर थापा, महिलातर्फ २ जनामा ममतादेवी शर्मा र सरस्वती खड्का परियार, युवातर्फ १ जनामा सिर्जना पन्तलाई सर्वसम्मत छनोट गरेको हो । केन्द्रीय सदस्य इन्द्रलाल सापकोटा, सूर्य पाठक, सावित्रा राना, जिल्ला अध्यक्ष हिराबहादुर खत्री र क्षेत्रिय संयोजक धनबहादुर परियार रहेको समितिले प्रतिनिधिको नाम टुङ्गो लगाएको हो ।
यस्तै, बागलुङ क्षेत्र नं. २ तर्फ खुल्लातर्फ भीमप्रसाद शेरचन ‘सुनिल’ र टंक पौडेल, महिलातर्फ करमती पुन र युवातर्फ दानबहादुर श्रीस बिहीबार नै सर्वसम्मत रुपमा चयन हुनुभएको छ । चार जना महाधिवेशन प्रतिनिधिका लागि १३ जनाले आवेदन दिए पनि सोही दिन सर्वसम्मत प्रतिनिधि छनोट गरिएको थियो । दलित कलष्टरबाट जिल्ला सहसचिव धनबहादुर परियार सर्वसम्मत प्रतिनिधि छनोट हुनुभएको छ ।
तश्विर :खबरवेबाट साभार
