बागलुङ, १६ पुस । आठौँ बागलुङ महोत्सवमा बुधबार अङ्ग्रेजी नयाँ वर्ष विशेष साङ्गीतिक उत्सव आयोजना गरिएको छ । ‘न्यू एयर इभ’को स्वागतसहित साङ्गीतिक ब्याण्ड फिरन्ते र रक हेड्सले प्रस्तुति दिने महोत्सव मूल आयोजक समितिका संयोजक एवं बागलुङ उद्योग वाणिज्य सङ्घका अध्यक्ष राजनकुमार शाक्यले जानकारी दिए । लाइभ डिजे कन्सर्टसहित गायक सम्भोज मल्ल पनि प्रस्तुत हुनेछन् । विशेष कार्यक्रमसहित अङ्ग्रेजी नयाँ वर्षलाई स्वागत गरिने मेलाका संयोजक शाक्यले बताए ।
नयाँ वर्षको कार्यक्रमका लागि छुट्टै टिकटको व्यवस्था गरिएको छ । यही पुस ११ गतेदेखि सुरु भएको बागलुङ महोत्सव आगामी २१ गतेसम्म सञ्चालन हुनेछ । महोत्सवमा खुला प्रदेशस्तरीय पुरूष तथा महिला भलिबल, खुला राष्ट्रिय दोहोरीगीत प्रतियोगिता, पञचेबाजा प्रदर्शनी तथा प्रतियोगिता, भाले छुने प्रतियोगिता, सामूहिक नृत्य, वक्तृत्वकला, लठो तान्ने, घैंटौफोर, तारो हान्नेलगायत विविध खेलकुद प्रतियोगिता आयोजना गरिएको छ ।
महोत्सवमा फोटो प्रदर्शनी, सांस्कृतिक झाँकी, स्थानीय खाना प्रवद्र्धन, सुन्तला, माछाको प्रदर्शनी, हस्तकला, कृषि तथा पशु, औद्योगिक उत्पादन, स्थानीय जटिबुटी, सूचना प्रविधि आदिको प्रदर्शनी तथा बिक्रीकक्ष रहेको अध्यक्ष शाक्यले बताउनुभयो ।
आठ लाख दर्शकले मेला अवलोकन गर्ने अनुमान गरिएको संघका निवर्तमान अध्यक्ष एवं सुरक्षा व्यवस्थापन उपसमितिका संयोजक नरेश कँडेलले बताउनुभयो ।
महोत्सवको प्रतिटिकटबाट रू. दस मानवसेवा आश्रम बागलुङलाई सहयोग गरिने भएको छ । टिकटबाट उठेको रकमबाट नेपाल पत्रकार महासङ्घ, बागलुङको संस्थागत विकास र जिल्लाको खेलकुद विकासमा सहयोग गरिने जनाइएको छ ।
महोत्सवबाट बचेको रकम व्यावसायीहरूको कल्याणकारी कोष, बागलुङ बजारमा सिसी क्यामेरा जडान तथा मर्मत, स्वास्थ्यका लागि खेलकुद कोष, अक्षयकोष निर्माण, कोशेली घर सञ्चालन आदिमा खर्च गरिने जनाइएको छ । महोत्सवमा रू. दुई करोड २० लाख आम्दानी हुने र रू. एक करोड ७० लाख खर्च हुने आयोजकको अनुमान छ । महोत्सवमा दुई सय बढी व्यावसायिक ‘स्टल’ रहेका छन् ।
