बागलुङ, ९ माघ । धवलागिरि बहुमुखी क्याम्पसले आफ्नो ६३औँ वार्षिकोत्सव मनाएको छ । साप्ताहव्यापी रुपमा विविध कार्यक्रम गरी वार्षिकोत्सव मनाईएको हो ।
त्रिभुवन विश्वविद्यालयका उपकुलपति प्राडा दीपक अर्यालले वार्षिकोत्सवको उद्धाटन गरेका हुन् । उद्धाटन पछि बोल्दै उनले त्रिभुवन विश्वविद्यालयलाई प्रशासनिक संरचनालाई विकेन्द्रित गरिने बताए । उनले पृथ्वीनारायण क्याम्पसलाई त्रिवि गण्डकी प्रदेशस्तरीय च्याप्टरका रुपमा विकास गर्न लागिएको बताए ।
उपकुलपति प्राडा अर्यालले शिक्षक र कर्मचारी नियुक्तीमा देखिँदै समस्या समाधानका लागि समयमा विज्ञापन गरिने उल्लेख गरे । उनले त्रिवि सुधारका लागि आफूले योजना बनाएर काम सुरु गरेको बताए ।
वार्षिकोत्सव समारोहमा बागलुङ नगरपालिकाका प्रमुख बसन्तकुमार श्रेष्ठ, नेपाल पत्रकार महासंघ, बागलुङका अध्यक्ष राम थापा स्वतन्त्र विद्यार्थी युनियन धौलागिरि बहुमुखी क्याम्पसका निवर्तमान स्ववियु अध्यक्ष सुदिप सागर कँडेल , धौलागिरि बहुमुखी क्याम्पसका निवर्तमान स्ववियु अध्यक्ष आश्मिन शेख लगायतले शुभकामना मन्तव्य व्यक्त गरेका थिए ।
कार्यक्रममा विभिन्न संकायमा उत्कृष्ट अंक ल्याउने विद्यार्थीसहित वार्षिकोत्सवका अवसरमा आयोजित विभिन्न खेलकुद तथा सांस्कृतिक कार्यक्रममा विजयी बनेका विद्यार्थीलाई पुरस्कृत गरिएको थियो ।
गत शुक्रबारदेखि सुरु भएको वार्षिकोत्सव सप्ताह अन्तर्गत पहिलो दिन पत्रकार भेटघाट, प्राध्यापक, कर्मचारी, स्ववियु र पत्रकारहरुबीच मैत्रीपूर्ण फुटबल, स्वास्थ्य शिविरलगायतका कार्यक्रम आयोजना गरिएको थियो । त्यसयता विद्यार्थी, प्राध्यापक, कर्मचारी, पत्रकारलगायत बीचमा विभिन्न खेलकुद प्रतियोगिता सम्पन्न भएको थियो ।
उक्त अवधिमा भलिबल, क्रिकेट, ब्याडमिन्टन, वादविवाद, म्याराथन लगायत विभिन्न खेलुकद प्रतियोगिता सहित शैक्षिक बहस कार्यक्रमकसमेत आयोजना गरिएको थियो ।
धवलागिरि बहुमुखी क्याम्पस व्यवस्थापन समितिका अध्यक्ष प्राडा दिन बहादुर थापाको अध्यक्षता, सहायक क्याम्पस प्रमुख हरि प्रसाद पाण्डेयको स्वागत र सहायक क्याम्पस प्रमुख डिल्लीराज गौतमको सञ्चालनमा सम्पन्न भएको थियो ।
