म्याग्दी, २६ फागुन । म्याग्दीको सदरमुकाम बेनीमा एकतर्फी पार्कीङको नियम लागू गराउन स्वमसेवक ट्राफिक परिचालन भएका छन् ।
साँघुरो सडक रहेको बेनी बजारभित्र यातायातका साधन र पैदलयात्रीको आवत जावतलाई सहज र व्यवस्थित बनाई दुर्घटना न्युनीकरण गर्ने उद्देश्यले वि.स. २०७८ देखि एकतर्फी यातायात सञ्चालन र वि.स. २०७७ मा एकतर्फी पार्कीङको नियम लागू भएको थियो ।
बजारबासी र यातायात ब्यवसायीहरुले एकतर्फी पार्कीङ र यातायात सञ्चालनको नियम उल्लङ्घन गर्न थालेपछि बेनीमा रहेको प्रकाश माविका विद्यार्थी, जिल्ला प्रहरी कार्यालय, ट्राफिक र बेनी नगरपालिकाको नगर प्रहरीको टोलीले दुई दिने संयुक्त अभियान शुरु गरेका जिल्ला ट्राफिक प्रहरी कार्यालय म्याग्दीका प्रमुख विशाल परियारले बताउनुभयो ।
जथाभावी पार्किङ र एकतर्फी यातायात सञ्चालनमा बेवस्ता हुँदा बजारभित्र सवारी साधन आवत जावत प्रभावित र दुर्घटनाका बढेको छ ।
प्रकाश माविका २० जना विद्यार्थीहरुले मंगलबार र बुधबार एक÷एक घण्टा बेनी बजारमा सबै टोलमा बसेर बजारबासी, पैदलयात्रु र ब्यापारीहरुलाई नियम पालनाका लागि अनुरोध गर्नेछन् ।
