बागलुङ, २८ फागुन। ढोरपाटन नगरपालिकामा फैलिएको दादुरा नियन्त्रणका लागि खोप अभियान थालिएको छ ।
ढोरपाटनको विकट गाउँमा महामारीको रुपमा फैलिएको दादुरा प्रकोप नियन्त्रणका लागि ढोरपाटन नगरपालिका भरका ६ हजार ७६३ बालबालिका र किशोर किशोरीलाई खोप लगाउने तयारी थालिएको प्रदेश जनस्वास्थ्य कार्यालय बागलुङ जनाएको छ ।
बागलुङको ढोरपाटन नगरपालिका वडा नम्बर ७, ८ र ९ मा दादुरा रोगका शंकास्पद ७४ जना बिरामी फेला परेका थिए । जसमध्ये ३२ जना भर्ना भएर उपचार भइसकेको छ । सात जना बालबालिका अझै उपचाररत रहेका छन् । दादुरा नियन्त्रणका लागि ढोरपाटन नगरपालिका–८ बोबाङ स्वास्थ्य चौकीमा आइसोलेसन तयार गरेर उपचार भइरहेको प्रदेश जनस्वास्थ्य कार्यालयका प्रमुख प्रविण शर्माले जानकारी दिनुभयो ।
तत्काललाई दादुरा नियन्त्रण गरी थप फैलन नदिनका लागि नगरपालिकाका सबै वडाका १० देखी १९ बर्ष उमेर समुहका किशोर किशोरीलाई दादुराको खोप प्रदान गर्न लागिएको छ ।
यस्तै उपचारमा संलग्न रहेका २३७ स्वास्थ्यकर्मीलाई समेत दादुरा बिरुद्धको खोप लगाउने तयारी थालिएको छ ।
खोप अभियानका लागि ढोरपाटन नगरपालिकाका ९ वटै वडामा फागुन २९ देखी चैत्र १ गते सम्म सञ्चालन गरिने छ । जस्का लागि अपुग स्वास्थ्यकर्मी छिमेकी गाउँपालिका बडिगाड र निसीखोलाबाट समेत झिकाइएको छ । अभियानमा महिला सवास्थ्य स्वयंसेविकाले समेत सघाउनेछ । स्वास्थ्य संकटग्रस्तका रुपमा लिएर संक्रमितको खोजतलास र उपचार संगै दादुरा नियन्त्रणका लागि खोप लगाउने तयारी गरिएको हो ।
फागुन ८ गते ढोरपाटनमा एक जनालाई दादुरा संक्रमण भएको पुष्टी भएको थियो । त्यस यता थप पाँच जनामा संक्रमण पुष्टी भएपनि अन्यलाई लक्ष्यण देखिएकाले नियन्त्रण योजना ल्याइएको हो ।
बिरामीको बुर्तिबाङ अस्पताल र बोबाङ स्वास्थ्यचौकीको आइसोलेसनमा उपचार गरिएको छ । हावाबाट सर्ने दादुराको संक्रमणबाट मानविय क्षती हुन नदिन र समयमै उपचार गराउनका लागि नेपाल सरकार स्वास्थ्य तथा जनसंख्या मन्त्रालयले आवश्यक खोप पठाएको छ । बुर्तिबाङ अस्पतालमा ३० वटा बेड, औषधी र आवश्यक सामग्री स्वास्थ्यमन्त्रालय गण्डकी प्रदेशसले व्यवस्थापन गरी पठाएको थियो ।
गाउँगाउँमै पुगेर नमुना संकलन, परिक्षण र संकास्पदलाई अस्पतालमै राखेर उपचार सुरु गरेका कारण छिट्टै नियन्त्रण गर्न सकिने अपेक्षा राखिएको छ । अधिकांश बिरामीलाई ज्वरो, खोकी र शरीरमा बिबिरा आउने गरेको पाइएको छ । नेपाल सरकारले सन् २०२६ भित्रै दादुरा रुबेलालाई ‘जनस्वास्थ्य समस्या नरहेको बनाउने’ अभियानलाई ढोरपाटनमा जोडेको हो ।
बागलुङ जिल्लामा सन् २०२२ मा गलकोट नगरपालिकामा १ जनालाई दादुरा संक्रमण देखिएको थियो । सन् २०२४ मा निसीखोला गाउँपालिकामा १ जनामा संक्रमण देखिएको थियो ।
दादुरा संक्रमण नियन्त्रणका लागि खोपनै सबैभन्दा उत्तम उपाए भन्दै ढोरपाटनका १० देखि १९ वर्ष उमेर समुहका सबै बालबालिकालाई तत्काल खोप लगाउन थालिएको हो ।
स्वास्थ्यकर्मीका अनुसार दादुरा लागेमा उच्च ज्वरो आउने, खोकी लाग्ने, नाक बग्ने, आँखा रातो हुने तथा शरीरभरि रातो दाना देखिने लक्षण देखा पर्छन् । समयमै उपचार नगरेमा निमोनियालगायत जटिल समस्या पनि देखिन सक्ने भएकाले लक्षण देखिएमा तत्काल स्वास्थ्य संस्थामा जाँच गराउन आवश्यक हुन्छ ।
