टोकियो ,जापान ।बक्स अफिसमा उल्लेखनीय सफलता हासिल गरेको सुपर हिट नेपाली चलचित्र ‘जेरी अन टप’ अब जापानी दर्शकहरूका लागि रेड कार्पेट प्रिमियरका साथ प्रस्तुत हुन लागेको छ।
चलचित्रको भव्य रेड कार्पेट प्रिमियर आगामी नोभेम्बर ३ तारिख (सोमबार) का दिन टोकियोस्थित नाकानो जेरो हलमा आयोजना गरिँदै छ।
प्रिमियरको पूर्व सन्ध्यामा आज टोकियोमा एक पत्रकार सम्मेलन सम्पन्न गरिएको छ, जसमा चलचित्रका प्रमुख कलाकारहरू अनमोल केसी, आँचल शर्मा, जशिता गुरुङ, निर्माता रोबिन शेरचन, निर्देशक सुयोग गुरुङ लगायतको उपस्थिति रहेको थियो।
कार्यक्रममा कलाकार अनमोल केसीले नेपाल बाहिर पनि नेपाली चलचित्रलाई हलमै प्रदर्शन गर्न सकिने वातावरण बनेमा नेपाली चलचित्र उद्योग अझ सशक्त बन्ने विश्वास व्यक्त गर्नुभयो।
त्यसै गरी, निर्माता रोबिन शेरचनले चलचित्रबाट प्राप्त हुने मुनाफा पुनः नेपाली चलचित्र उद्योगमा लगानी गर्ने प्रतिवद्धताजनाउनुभयो। उहाँले जापानमा आयोजना हुन लागेको यो प्रिमियर नेपाली कला र संस्कृतिको अन्तर्राष्ट्रिय प्रचारमा महत्त्वपूर्ण भूमिका खेल्ने बताउनुभयो।
पत्रकार सम्मेलनको सञ्चालन नेपाल पत्रकार महासङ्घ जापानका निवर्तमान अध्यक्ष मोहन घलेले गर्नुभएको थियो।
भोली सोमबारको प्रिमियर शो बेलुका ६:३० बजेदेखि ९:३० बजेसम्म सञ्चालन हुनेछ।
आयोजक तथा गैर आवासीय नेपाली संघ (NRNA) अन्तर्राष्ट्रिय समन्वय परिषद्का उपाध्यक्ष रोबिन प्रसाद शेरचनले जापानमा रहेका सम्पूर्ण नेपाली समुदाय, संघ–संस्था तथा समाजका प्रतिनिधिहरूलाई कार्यक्रममा गरिमामय उपस्थितिको लागि हार्दिक निमन्त्रणाको आग्रह गर्नुभएको छ।
मिति: २०२५ नोभेम्बर ३ (सोमबार)
स्थान: नाकानो जेरो हल, टोकियो
समय: बेलुका ६:३० देखि ९:३० बजेसम्म
