बागलुङ, २० जेठ । बागलुङमा क्रियाशिल संचारकर्मीका लागि स्वास्थ्य प्रवद्र्दन सम्बन्धी सञ्चार तथा पैरवी र स्वास्थ्य प्रवद्र्दन कार्यक्रम तथा अभिमुखीकरण कार्यक्रम सम्पन्न भएको छ ।
बुधबार गण्डकी प्रदेश सरकार, स्वास्थ्य मन्त्रालयको आयोजनामा जिल्लाका क्रियाशिल पत्रकारका लागि आरोग्यताका लागि विभिन्न जानकारी दिइएको थियो ।
कार्यक्रममा गण्डकी प्रदेश स्वास्थ्य मन्त्रालयका डा. रमेश कुमार केसीले स्वस्थ्य जीवनका लागि तनाव व्यवस्थापन, जनस्वास्थ्य र स्वस्थ्य रहने शुत्रबारे जानकारी गराएका थिए । पत्रकारका लागि योगध्यानबारे सिकाए र प्रयोग समेत गराएका थिए । मानव मस्तिस्कले गर्ने काम र सकारात्मक उर्जा र नकारात्मक असरबारे उनले बुझाए ।
कार्यक्रममा बुर्तिवाङ अस्पतालका डा. अभिनाष पोखरेलले दादुरा रोगको प्रकोप, व्वस्थापनबारे जानकारी गराए । साथै, महामारी र प्रकोपजन्य रोगको बेला सञ्चार क्षेत्रले खेल्नुपर्ने भूमिकाबारे जानकारी गराएका थिए । उनले गत फागुनमा ढोरपाटनमा दादुरा फैलिएको बेला सचेतना पुर्ण काम गरेर नियन्त्रणमा लिन सकेको उदाहरण प्रस्तुत गरे ।
कार्यक्रममा अर्का डा. अभिषेक बगालेले मानव जीवनमा आहार, बिहार, आचरण र विचारले स्वस्थ्य रहन सकिने बताए । उनले त्यसका लागि ओरिजिन, रिजनल र सिजनल खाना खान सुझाव पनि दिए ।
वातावरणको कारणले मानिसमा २० प्रतिशत मात्रै रोग लाग्ने, आनुवंशिकबाट २० प्रतिशत र स्वास्थ्य प्रणालीले १० प्रतिशत मात्रै रोग लाग्ने भन्दै जीवन शैली र खानपानका कारण नै ५० प्रतिशत रोग लाग्ने भएकोले आहार–विहारमा ख्याल गर्न पनि सुझाव दिए ।
अस्पताल नभएर मर्नेभन्दा जीवनशैली बदल्न नसक्दा धेरै मानिस मर्ने गरेको तथ्यांक दिए । उनले बिहान सबेरै उठ्ने र बेलुकी छिटो सुत्ने जस्ता आचरण गर्न पनि सुझाए । वैज्ञानिक कारण अनुसार उपबास बस्ने विषय समेत रहेको कार्यक्रममा जनाइएको थियो । कार्यक्रममा पत्रकार महासंघ बागलुङका उपाध्यक्ष सुवास आचार्यले स्वस्थ्य जीवनका लागि भएका प्रयास र पत्रकारले पनि ती प्रयास अपनाउनुपर्ने बताए । साथै मन्त्रालय, प्रदेश जनस्वास्थ्य कार्यालय र आर्युवेद अस्पताल बागलुङले गरेको प्रयासलाई धन्यवाद दिएका थिए ।
